Grubi – Woutsas: Austria përkrahëse e fuqishme e politikave evropiane të Maqedonisë së Veriut

Zëvendëskryeministri i parë dhe Ministër për Sistem Politik dhe Marrëdhënie Ndërmjet Bashkësive, z.Artan Grubi në vazhdën e takimeve me diplomatë të akredituar në Maqedoni të Veriut sot në kabinetin e tij priti ambasadorin e Austrisë, z. Georg Woutsas.

Në këtë takim i cili ishte tejet pozitiv dhe miqësor u vlerësuan lartë marrëdhëniet politike mes Maqedonisë së Veriut dhe Austrisë duke mos anashkaluar këtu dhe bashkëpunimin ekonomik.

Grubi e informoi ambasadorin austriak se ai bashkë me ekipin e tij do të kujdeset që të ketë kohezion në koalicion dhe që ai do të jetë koordinator i resorëve politik në Qeveri duke përfshirë harmonizimin e qëndrimeve mes partnerëve të koalicionit dhe mbajtjen e konsensualitetit.

Grubi gjithashtu gjatë këtij takimi i tha ambasadorit Woutsas se rruga e drejtësisë joselektive dhe sundimi i ligjit do të arrihen vetëm me transparencë të plotë dhe përmes vetingut të bartësve të funksioneve publike, gjykatësve dhe prokurorëve.

Nga ana e tij ambasadori Woutsas nuk mbeti pa përmendur dhe situatën e krijuar në vend por dhe në mbarë botën me pandeminë e shkaktuar nga virusi COVID-19.

Woutsas i tha Grubit se Republika e Maqedonisë së Veriut duhet të bëj përpjekje maksimale me qëllim menaxhimin sa më të suksesshëm të situatës me virusin COVID-19 me qëllim që të mund sa më shpejt të kthej normalizimin e funksionimit të kufijve.

Në fund të takimit bashkërisht u konkludua se ecja përpara e vendit, veçanërisht në rrugën evropiane, kërkon sjellje shumë të përgjegjshme edhe atë nga të gjithë, me qëllim që sa më shpejtë të nisin bisedimet me Bashkimin Evropian.

Me respekt,

Sektori për marrëdhënie me opinionin

Kabineti i zëvendës kryeministrit të parë dhe Ministrit për Sistem Politik dhe Marrëdhënie ndërmjet Bashkësive